JAMII YANGU

GHANA YATUHUMIWA KWA UFISADI KOMBE LA DUNIA, FIFA KUCHUNGUZA TUHUMA ZA UBAGUZI KWA MASHABIKI WA UJERUMANI

Kikosi cha Ghana

Shirikisho la soka nchini Ghana limewataka maafisa wa polisi kuingilia kati baada ya madai ya vyombo vya habari vya Uingereza kwamba mmoja wa maafisa wake alikubali timu ya nchi hiyo kucheza katika mechi zilizo fanyiwa ufisadi.

Mamlaka ya Soka nchini Ghana imekana madai ya jaribio lolote la kuuza mechi zake ama kuhusika kwa afisa yeyote katika ufisadi.
Madai hayo yametolewa kufuatia uchunguzi wa pamoja kati ya gazeti la Uingereza la Daily Telegraph na Runinga ya Channel Four.
Katika taarifa yake shirikisho la soka duniani FIFA limesema kuwa hakuna ushahidi kwamba uadilifu wa michuano ya kombe la dunia umeathirika.
Shirikisho la soka nchini Ghana limesema kuwa litamuekea vikwazo vikali afisa yeyote atakayepatikana na makosa hayo.

WAKATI HUOHUO SHIRIKISHO la Soka Dunia-FIFA linatarajia kuchunguza tuhuma za ubaguzi zinazodaiwa kutolewa na mashabiki wa Ujerumani katika mchezo dhidi ya Ghana ambao ulimalizika kwa sare ya mabao 2-2 huko Fortaleza.

Picha zilionyesha baadhi ya mashabiki wakiwa wamejipaka rangi nyeusi katika nyuso zao katika mitandao ya kijamii, na kuzua mjadala kuwa mashabiki wa timu za Ulaya wanaonyesha tabia za kibaguzi. Kuongezea uzito madai hayo ni tukio la mshabiki mmoja, ambaye aliingia uwanjani akiwa na maandishi kuhusu Nazi wakati wa kipindi cha pili cha mchezo huo. Msemaji wa FIFA amesema siku zote wanachukua ushahidi wowote unaowasilishwa au kuonekana katika kamati yao ya nidhamu na wao ndio wanaokutana kuangalia kama wanaweza kufungua kesi na baadae tume ya nidhamu kutoa maamuzi.